ACCUEILE consumeish mei d’aiga que las autas cerealas lo milhòc ?
Segon un estudi deu CNRS, que cau 238 litres d’aiga entà produsir 1 kg de matèria seca de milhòc ensilatge (destinat a neurir los animaus de neurissatge), 454 litres entau milhòc gran, 490 litres entau blat e 900 litres entà 1 kg de matèria seca de sòja. Lo milhòc qu’ei tanben un purificator d’aire. Que produseish hèra d’oxigèna, qu’absorbeish gas carbonic e « gaha » dens lo sòu lo carbòni deu gas carbonic, empachà’u de polluïr l’atmosfèra e d’ahortir l’efèit de sèrra.
Lo milhòc qu’absorbeish pendent la soa creishença, importantas quantitats de nitrats, qui potza dens lo sòu. Lo milhòc qu’ei un actor important de la « quimia verda ».
L’amidon de milhòc, produit naturau, renovelable e biodegradable, que remplaça los compausants quimics dens nombrós produits d’usatge corrent : potingas, papèrs, plastics, pegas, pintruras, materiaus de construccion, detergents. D’un aute costat, l’etanòl, derivat deu milhòc, carburant renovelable a la diferéncia deu petròli, que balha neishença a un carburant « net », qui pollueish hèra mensh que l’esséncia tradicionau.
Perqué cau irrigar lo milhòc ?
Lo milhòc qu’ei ua cultura d’estiu. Que creisha donc a un periòde de l’annada on plau lo mensh. Qu’ei la rason per la quau a besonh d’estar adaigat. Los productors de milhòc qu’an alavetz recors a l’irrigacion. En França, sus 3 milions d’ectaras de milhòcs grans, semenças e pasturas, 750 000 ectaras que son irrigats sia 25 %. Ua chifra en constanta diminucion despuish 10 ans (-130 000 ha).
Çò qu’ei l’interès de cultivar lo milhòc ?
Lo milhòc qu’ei ua cereala qui presenta un apòrt energetic e las qualitats nutricionaus importantas. Lo gran de milhòc qu’ei compausat d’amidon, de proteïnas, de matèrias grassas, de mineraus e de vitaminas.
Lo milhòc pastura
Dusau ressorsa forrastèra après l’èrba, qu’ei vadut la principau pastura dens l’alimentacion ivernau de las vacas leitèras. Qu’ei un produit naturau dens lo quau l’agricultor a hidança : que coneish la soa origina e lo son mòde de produccion. Conservat com cau, lo milhòc pastura qu’ei apreciat per las vacas leitèras e qu’a ua bona valor energetica .
Ua valorizacion de qualitat
Segon l’INRA (Institut Nacionau de la Recèrca Agronomica), la consomacion de milhòc pastura qu’ei recomandada entà melhorar la qualitat deu burre en ivèrn (riquessa vitaminica, color, textura).
Las bèstias neuridas dab milhòc pastura que produseishen ua carn de hèra bona qualitat, com l’an demostrat experimentacions sus Blondas d’Aquitània.
Lo milhòc gran
Près deus tres-quarts de la produccion de milhòc gran que son consumits peus animaus, sauvatges e domestics, poralhas e pòrcs principaument. Lo milhòc qu’ei dirèctament consumit dens las bòrdas o venut aus fabricants d’aliments entà bestiar. Trissat e mesclat ad autas matèrias prumèras taus com lo sòja o lo céser, qu’entra dens la composicion de las harias e granulats.
Un aliment energetic…
Lo milhòc gran qu’ei apreciat en alimentacion animau entau son apòrt energetic haut, gràcias a la soa riquessa en amidon e a l’òli deu son gèrme. Pr’amor de la soa composicion, lo milhòc qu’a especificitats interessantas sustot entau neurissatge deus porets devath labèl (Label Rouge, per exemple) e de las garias uevassèras. Que constitueish tanben l’aliment de referéncia, dont son gessits de nombrós labèls de qualitat : volailles des Landes ou de Bresse, jambon de Bayonne,, hitges gras.